ခရစ္စအီဗန်စ်ရဲ့ MCU ရုပ်ရှင်ကားမဟုတ်တဲ့ အကောင်းဆုံးရုပ်ရှင်ကား(၅)ကား

Imdb

အမျိုးသမီးတွေရဲ့ အသည်းစွဲမင်းသားတစ်လက်ဖြစ်တဲ့ ခရစ္စအီဗန်စ်ဟာ MCU ရုပ်ရှင်ကားတွေထဲမှာ ကပ္ပတိန်အမေရိကားအဖြစ် နာမည်ကျော်ကြားပါတယ်။ ဒါပေမယ့် အခုတစ်ခေါက် တင်ဆက်ပေးမှာကတော့ ခရစ္စအီဗန်စ်ရဲ့ ကပ္ပတိန်အမေရိကားအနေနဲ့ မဟုတ်ဘဲ သူ သရုပ်ဆောင်ထားတဲ့ ရုပ်ရှင်ကားတွေထဲက အကောင်းဆုံးရုပ်ရှင်ကားတွေပါ။ ရုပ်ရှင်အကဲဖြတ် ဝက်ဘ်ဆိုက်တစ်ခုဖြစ်တဲ့ IMDB က ရွေးချယ်ထားတဲ့ စာရင်းပဲဖြစ်ပါတယ်။

၁ – Cellular

ရမှတ် –  6.5/10 

အမေရိကန်ဒါရိုက်တာ ဒေးဗစ်အာအီလဇ်ဆိုသူ ရိုက်ကူးတဲ့ Cellular ရုပ်ရှင်ကားထဲမှာ ခရစ္စအီဗန်စ်တစ်ယောက် သရုပ်ဆောင်ခဲ့ရပါတယ်။ ဆယ်လူလာရုပ်ရှင်ဟာ  action-thriller ရုပ်ရှင်အမျိုးအစားတစ်ခုပါ။

 ဆယ်လူလာရုပ်ရှင်ကားထဲမှာ ခရစ္စအီဗန်စ်ဟာ လူငယ်တစ်ယောက်အဖြစ် သရုပ်ဆောင်ခဲ့ရတာပါ။ ရုပ်ရှင်ထဲမှာ သူဟာ အမည်မသိအမျိုးသမီးတစ်ယောက်ဆီက ဖုန်းနံပတ်အစိမ်းနဲ့ ဖုန်းတစ်ကောလ်ဝင်လာခဲ့ပါတယ်။ တစ်ဖက်အမျိုးသမီးဟာ လူဆိုးတွေရဲ့ ပြန်ပေးဆွဲခံရပြီးနောက်မှာ ဆက်လိုက်ခြင်းဖြစ်ပါတယ်။ အစကတော့ နောက်ပြောင်တဲ့ ဖုန်းတစ်ကောလ်လို့သူက ထင်နေပေမယ့် သိပ်မကြာခင်မှာပဲ အဲဒီဖုန်းခေါ်ဆိုမှုဟာ အစစ်အမှန်ဖုန်းခေါ်နေတာလို့ သူ သိရှိသွားပြီးနောက်မှာ ခရစ္စအီဗန်စ်တစ်ယောက်ဟာ အဲဒီအမျိုးသမီးအသက်ဆက်ရှင်ဖို့အတွက် တစ်ခုတည်းသောမျှော်လင့်ချက် ဖြစ်လာပါတော့တယ်။

အဲဒီ ရုပ်ရှင်ထဲမှာ ခရစ္စအီဗန်စ်ရဲ့ အကောင်းဆုံးသရုပ်ဆောင်မှုကို မြင်တွေ့ရနိုင်ပါတယ်။ ဆယ်လူလာရုပ်ရှင်ထဲမှာ မြင်တွေ့ရဦးမယ့် နောက်ထပ်မင်းသားတစ်လက်ကတော့ Jason Statham ပဲဖြစ်ပါတယ်။

၂ – The Iceman

ရမှတ် – 6.8/10

The Iceman ရုပ်ရှင်ထဲမှာ ခရစ္စအီဗန်စ်တစ်ယောက်ကို ဆံပင်ရှည်ရှည်၊ ပသိုင်းမွှေးတွေနဲ့  မြင်တွေ့ရမှာပါ။

The Iceman ရုပ်ရှင်ဟာ တကယ့်ဖြစ်ရပ်မှန်ကိုနောက်ခံထားပြီး ရိုက်ကူးထားတဲ့  ရုပ်ရှင်ကားတစ်ကားလည်းဖြစ်ပါတယ်။Richard Kuklinskiဆိုတဲ့ ဂန္ထဝင်လူဆိုးကြီးတစ်ယောက်ရဲ့ ဖြစ်ရပ်မှန်ကို ရိုက်ကူးထားတာပါ။

အဲဒီ ရုပ်ရှင်ထဲမှာ မင်းသားကြီး Michael Shannon ၊ James Franco ၊Ray Liottaနဲ့ တစ်ချိန်က ဂျော်နီဒပ်ရဲ့လက်တွဲဖော်ချစ်သူတစ်ယောက်ဖြစ်ခဲ့ဖူးတဲ့ Winona Ryder စတဲ့ နာမည်ကြီး သရုပ်ဆောင်ပေါင်းများစွာ ပါဝင်ထားတဲ့ ရုပ်ရှင်ကားကောင်းတစ်ကားဖြစ်ပါတယ်။

၃ – Street Kings

ရမှတ် – 6.8/10

Street Kings  ရုပ်ရှင်ထဲမှာ ခရစ္စအီဗန်စ်အပြင် နောက်ထပ်မြင်တွေ့ရဦးမယ့် မင်းသားတစ်လက်ကတော့ ကီယာနူးအိဗ့်တစ်ယောက်ပဲဖြစ်ပါတယ်။ နှစ်ယောက်စလုံးကလည်း အခုအချိန်မှာ အမျိုးသမီးတွေရဲ့ စိတ်ဝင်စားခြင်းကို အထူးခံနေရတဲ့ မင်းသားနှစ်လက်အပြင် Forest Whitaker လို ဝါရင့်သရုပ်ဆောင်တွေပါတဲ့ ရုပ်ရှင်ဆိုတော့ အထူးညွှန်းဆိုစရာမရှိတော့ပါဘူး။

လမ်းဘေးဘုရင်များဆိုတဲ့ ရုပ်ရှင်ဇာတ်ကားရဲ့နာမည်နဲ့ ညီအောင် လမ်းဘေးအထာတွေ တဝကြီးနဲ့ ခံစားနိုင်မယ့် ရုပ်ရှင်ဖြစ်ပါတယ်။ ဒီရုပ်ရှင်ထဲမှာ ခရစ္စအီဗန်စ်ရဲ့ သရုပ်ဆောင်စွမ်းရည်ကို ကောင်းကောင်းမြင်ရနိုင်ရုံတင်သာမက ကီယာနူးအိဗ့်ရဲ့ သရုပ်ဆောင်ပိုင်နိုင်မှုကို မြင်တွေ့ရဦးမှာပါ။

၎ – Snowpiercer 

ရမှတ် – 7.1/10

လက်ရှိ ၂၀၁၉ ရုပ်ရှင်တွေထဲမှာ အကောင်းဆုံးရုပ်ရှင်ကားစာရင်းတွေထဲမှာအမြဲပါဝင်နေတဲ့ Parasite  ရုပ်ရှင်ရိုက်ကူးသူ တောင်ကိုရီးယားဒါရိုက်တာဖြစ်တဲ့ Bong Joon-ho ရဲ့ ရုပ်ရှင်ဇာတ်ကားတစ်ကားပါ။  ဒါ့အပြင် Snowpiercer ဟာ Bong Joon-ho ရဲ့ ပထမဆုံး အင်္ဂလိပ်စကားပြော ရုပ်ရှင်ကားတစ်ကားပါ။

 Snowpiercer  ရုပ်ရှင်ကားဟာ အခုအချိန်အထိတိုင်အောင် ရာသီဥတုပြောင်းလဲမှု၊ အရင်းရှင်ကမ္ဘာကြီးကို ညွှန်းဆိုချက်တစ်ခုစတဲ့ အကြောင်းအရာမျိုးစုံနဲ့ ပတ်သက်ပြီး အငြင်းပွားနေရတဲ့ ရုပ်ရှင်ကားကောင်းတစ်ကားပါ။ ခရစ္စအီဗန်တစ်ယောက်ကတော့ အဲဒီ ရုပ်ရှင်ထဲမှာ စိတ်ဒဏ်ရာရနေတဲ့ လူတစ်ယောက်၊အဖိနှိပ်ခံလူတွေရဲ့ ခေါင်းဆောင်တစ်ယောက်အဖြစ် သရုပ်ဆောင်ထားပါတယ်။

၅ – Sunshine

ရမှတ် – 7.2/10

Sunshine ရုပ်ရှင်ဟာ သိပ္ပံစိတ်ကူးယဉ်ရုပ်ရှင်ကားတစ်ကားဖြစ်ပြီး အလှည့်အပြောင်းများစွာကို ကြည့်ရှု့ရဦးမယ့် ရုပ်ရှင်ကားတစ်ကားပါ။ ခရစ္စအီဗန်စ်ရဲ့ သရုပ်ဆောင်စွမ်းရည် အနယ်ကျချိန်နဲ့ အတောက်ပြောင်ဆုံးကာလရဲ့ ပထမဆုံးဦးကားလို့တောင်ဆိုရပါလိမ့်မယ်။ Sunshine ရုပ်ရှင်ထဲမှာပါတဲ့ ခရစ္စအီဗန်စ်ဟာ ရင့်ကျက်လာတဲ့ သရုပ်ဆောင်တစ်ယောက်ရဲ့ ပုံကို ရရှိသွားတာကို မြင်တွေ့ရမယ့် ရုပ်ရှင်ကားဆိုလည်း မမှားပါဘူး။ 

Ye Yint Kyaw

SHARE