(၂၀၂၀)ခုနှစ် ဗီယက်နမ်အလှမယ်ဘွဲ့ကို သိမ်းပိုက်နိုင်ခဲ့တဲ့ လယ်သမားကြီးသမီး

instagram/missworldvietnam

ဗီယက်နမ်နိုင်ငံ Thanh Hoa ပြည်နယ် မြောက်အလယ်ပိုင်းမှာနေထိုင်သူ ၁၉နှစ်အရွယ်မိန်းကလေး Do Thi Ha ဟာ သောကြာနေ့ညတုန်းက Miss Vietnam 2020 သရဖူကို ဆွတ်ခူးခဲ့ပါတယ်။ သူမဟာ ကျေးလက်မှာနေထိုင်သူ လယ်သမားကြီးတစ်ဦးရဲ့သမီးဖြစ်ကာ အခြားသော ပြိုင်ပွဲဝင် ၃၄ ဦးကို အနိုင်ယူကာ ဗီယက်နမ်အလှမယ်ဖြစ်လာခဲ့တာပါ။

၂၀၂၀ခုနှစ်ရဲ့ ဗီယက်နမ်အလှမယ်ပြိုင်ပွဲကိုတော့ Ho Chi Minh City မှာ ပြုလုပ်ခဲ့ပါတယ်။ ပြိုင်ပွဲမှာတော့ ပထမဆုံးဗီယက်နမ်ရိုးရာဝတ်စုံ “ao dai” ဝတ်ဆင်ကာ အရင်ဆုံးယှဉ်ပြိုင်ရပြီး ထိုထဲကမှ ၂၂ ဦးရွေးချယ်ကာ ရေကူးဝတ်စုံနဲ့ယှဉ်ပြိုင်ရပါတယ်။ ထိုထဲက ၁၅ယောက်ထပ်ရွေးပြီး ညနေခင်းဝတ်ဝတ်စုံ evening gown အတွက် ဆက်လက်ယှဉ်ပြိုင်ရပါတယ်။ ထို့နောက်မှာတော့ ဒိုင်တွေက ဆန်ကာတင် ငါးယောက်ထပ်ရွေးပြီး Q& A ဖြေဆိုရကာ ဒီထဲကမှ နောက်ဆုံး သုံးယောက်ကို ထပ်မံရွေးချယ်ခဲ့တာပါ။

နောက်ဆုံးပြိုင်ပွဲညရဲ့အဆုံးမှာတော့ Do Thi Ha ကပဲ အလှမယ်ဘွဲ့ကိုသိမ်းပိုက်သွားခဲ့ပါတယ်။ Pham Ngoc Phuong Anh ကတော့ ဒုတိယနေရာ၊ Ngugen Le Ngoc Thao ကတော့ တတိယနေရာ အသီးသီးရရှိသွားခဲ့ပါတယ်။ သူမဟာ အရပ် ၅ပေ ၈လက်မရှိပါတယ်။ လက်ရှိ ဟနွိုင်းက National Economics University မှာ ပညာသင်ကြားနေတဲ့ ဒုတိယနှစ်ကျောင်းသူလည်း ဖြစ်ပါတယ်။ Do Thi Ha ဟာ Media Beauty, Fashion Beauty နဲ့ Sea Beauty awards ပြိုင်ပွဲတွေမှာလည်း အနိုင်ရရှိဖူးသူ ဖြစ်ပါတယ်။

သူမဟာ သူမရဲ့တက္ကသိုလ် NEU က ကျင်းပတဲ့အလှမယ်ပြိုင်ပွဲကနေ ဗီယက်နမ်တစ်နိုင်ငံလုံးအဆင့် အလှမယ်ပြိုင်ပွဲအထိ တက်လှမ်းနိုင်ခဲ့တာဖြစ်ပါတယ်။ Do Thi Ha  ဟာ နွားပေါက်လေးကိုသယ်ယူပေးရတဲ့အလုပ်နဲ့ စားပွဲထိုးအလုပ်ကိုလည်း ဝင်ငွေအတွက် လုပ်ကိုင်နေပါတယ်။ Ho Chi Minh City မှာ ကျင်းပပြုလုပ်တဲ့ နိုင်ငံတော်အဆင့်အလှမယ်ပြိုင်ပွဲနဲ့ပတ်သက်ပြီး ကုန်ကျစရိတ်တွေကိုတော့ Do Thi Ha ဟာ သူမကိုယ်တိုင် စုဆောင်းရှာဖွေခဲ့တာပါ။ သူမရဲ့မိဘတွေကတော့ ကျေးလက်မှာအလုပ်လုပ်နေကြတဲ့ လယ်သမားတွေ၊ နေ့စားသမားတွေဖြစ်ပြီး သူမရဲ့ပြိုင်ပွဲတစ်လျှောက်မှာလည်း အားပေးထောက်ပံ့ခဲ့ကြတယ်လို့ tuoitrenews အရ သိရပါတယ်။

ShweMom

SHARE