လူမျက်ခုံးမွေးလို ပါနေလို့ အရုပ်ဆိုးတယ်ဆိုပြီး ပိုင်ရှင်က စွန့်ပစ်ခံခဲ့ရတဲ့ ခွေးမလေး

Instagram / Oksana Maymsina

ခွေးမလေးတစ်ကောင်ဟာ လူတွေရဲ့မျက်ခုံးမွေးပုံစံအတိုင်း မျက်လုံးပေါ်မှာ ထင်ထင်ရှားရှား ပါနေတဲ့အတွက် ပိုင်ရှင်က အရုပ်ဆိုးတယ်လို့ ယူဆပြီး စွန့်ပစ်ခဲ့ပုံရပါတယ်။ ခွေးမလေးဟာ ရုရှားနိုင်ငံ၊ ဆိုက်ဘေးရီးယားမှာတည်ရှိတဲ့ Bratsk မြို့က လမ်းမတစ်ခုမှာ စွန့်ပစ်ခဲ့ခဲ့ရတာပါ။ အလွန်အေးချမ်းတဲ့ ရာသီဥတုကြောင့် သူမဟာ ဒုက္ခအလွန်အမင်း ရောက်ခဲ့ပါတယ်။

ဒါပေမယ့် ကံကောင်းလွန်းစွာပဲ တိရစ္ဆာန်စောင့်ရှောက်ရေးအဖွဲ့တစ်ဖွဲ့က ဝန်ထမ်းတွေက ဒီခွေးမလေးကို တွေ့သွားခဲ့ပါတယ်။ ခွေးမလေးနာမည်ကိုတော့ Betty လို့ အမည်ပေးထားပါတယ်။ အခုမှ အသက်(၅)လသာ ရှိပါသေးတယ်။ ခွေးမလေးဟာ ကံကောင်းချင်တော့ သူမရဲ့ မျက်ခုံးမွေးလို မည်းမည်းစင်းစင်း အရာနှစ်ခုကြောင့်ပဲ လူသိများလာခဲ့ပါတယ်။

Oksana Maymsina

ခွေးမလေးကို တွေ့တွေ့ချင်း ဒေသခံ တိရစ္ဆာန်စောင့်ရှောက်ရေးအဖွဲ့က ရေမိုးချိုသန့်စင်ပေးပြီး၊ လိုအပ်တဲ့ ဆေးဝါးစောင့်ရှောက်မှုတွေနဲ့ အစားအစာတွေ ကျွေးခဲ့ပါတယ်။ အဲဒီအဖွဲ့မှ တာဝန်ရှိသူတစ်ဦးဖြစ်တဲ့ Olesya Novopoltseva က သူမအနေနဲ့ လုပ်သက်တစ်လျှောက်လုံးမှာ ဒီလို ချစ်စဖွယ်ကောင်းပြီး ထူးဆန်းတဲ့ ခွေးပုံစံမျိုး မတွေ့ခဲ့ဖူးဘူးလို့ ဆိုပါတယ်။

အခုတော့ ခွေးမလေး Betty ကို ပိုင်ရှင်အသစ်ဖြစ်တဲ့ Oksana Maymsina က မွေးမြူဖို့ ခေါ်ယူသွားခဲ့ပြီလို့ သိရပါတယ်။ Oksana ဟာ ခွေးမလေးကို ပိုင်ဆိုင်ချိန်ကနေစတင်ပြီး၊ Betty အတွက် လူမှုကွန်ရက်အကောင့်တောင် ဖွင့်ပေးခဲ့ပြီးပါပြီ။ အခုဆို Betty ဟာ ပေါ်ပြူလာဖြစ်လာလို့ ရုရှားတီဗွီအစီအစဉ်တစ်ခုရဲ့ Chat Show မှာ ပါဝင်လာတော့မှာပါ။

Instagram / Oksana Maymsina

Oksana က “ ဒီခွေးမလေးအကြောင်းကို လူမှုကွန်ရက်ပေါ်မှာ သိပြီးတော့ သနားလွန်းလို့ ငိုခဲ့ရတယ် .. သူမကို မွေးရရင် ကောင်းမယ်လို့လည်း စိတ်ကူးခဲ့ပြီး တာဝန်ရှိသူတွေကို ဆက်သွယ်ခဲ့တာပါ … ”လို့ ပြောခဲ့ပါတယ်။ ပထမတုန်းကတော့ ခွေးမလေးရဲ့ ထင်ရှားနေတဲ့ မျက်ခုံးမွေးပုံစံကြောင့် တိရစ္ဆာန်စောင့်ရှောက်ရေးအဖွဲ့က Frida လို့ အမည်ပေးခဲ့ပါတယ်။

Frida ဟာ မက္ကဆီကို ပန်းချီဆရာမတစ်ဦးဖြစ်ပြီး၊ သူမရဲ့ ထူးခြားတဲ့ မျက်ခုံးမွေးကြောင့် နာမည်ကြီးခဲ့သူပါ။ (၁၉၅၄)ခုနှစ် သူမရဲ့အသက် (၄၇)နှစ်မှာ သေဆုံးသွားခဲ့သူ ဖြစ်ပါတယ်။ သူမကို ဂုဏ်ပြုတဲ့အနေနဲ့ ဒီနာမည်ကိုပေးခဲ့ပေမယ့် ပိုင်ရှင်အသစ်ဖြစ်တဲ့ Oksana က Betty လို့ အမည်ပြောင်းပေးခဲ့တာပါ။

Instagram / Oksana Maymsina

လင်းသုတ

SHARE