မိဖုရား(၁၄)ဦးအတွက် Rolls-Royce ကား(၁၉)စီး ဝယ်ယူခဲ့တဲ့ ဆွာဇီလန်ဘုရင်

Twitter / Dailymail

ဆွာဇီလန်နိုင်ငံရဲ့ သက်ဦးဆံပိုင်ဘုရင်ဖြစ်တဲ့ Mswati III ကတော့ အများပြည်သူ ဆင်းရဲကျပ်တည်းနေချိန်မှာ ပေါင်(၁၃)သန်းကို တစ်ထိုင်တည်းနဲ့ သုံးခဲ့တယ်လို့ သိရပါတယ်။ Mswati III ဟာ တန်ဖိုးကြီး ဇိမ်ခံကားဖြစ်တဲ့ Rolls-Royce ကား (၁၄)စီးအထိ ဝယ်ယူခဲ့ပြီး၊ သူရဲ့ချစ်လှစွာသော မိဖုရား(၁၄)ဦးကို ပေးခဲ့တယ်လို့ သိရပါတယ်။

သတင်းတွေအရတော့ သူဟာ သားတော်သမီးတော် ဆွေတော်မျိုးတော်တွေအတွက်လည်း BMW ကား အစီး(၁၂၀)အထိ နိုင်ငံအတွင်း တင်သွင်းခဲ့ကြောင်း သိရပါတယ်။ ဒါဟာ နိုင်ငံသားတွေ အလွန်ဆင်းရဲဒုက္ခရောက်နေချိန်မှာ ဘုရင်က ထင်ရာစိုင်းပြီး ပြည်သူ့ဘဏ္ဍာကို စိတ်ကြိုက်အသုံးပြုနေတဲ့သဘောမို့၊ ဆဲတာနဲ့ အတူတူဖြစ်ကြောင်း ဝေဖန်နေကြပါတယ်။

ဆွာဇီလန်ပြည်သူတွေဟာ ပျမ်းမျှ လုပ်ခလစာ ပေါင် (၁၁၀)ဝန်းကျင်သာ ရရှိကြပြီး၊ အခုလို ငွေကို အလျှံပယ်သုံးနေတာဟာ ပြည်သူကို အလေးမထား ငါနဲ့ကိုင်တုတ်နေတာနဲ့ တူညီကြောင်း အတိုက်အခံသတင်းစာတွေက ရေသားကြသလို၊ နိုင်ငံရေးအရ သြဇာတိက္ကမရှိတဲ့သူတွေကလည်း ဘုရင် Mswati III ရဲ့လုပ်ရပ်ကို ပြင်းပြင်းထန်ထန် ကန့်ကွက်နေပါတယ်။

သူရဲ့လုပ်ရပ်ကြောင့် လမ်းပေါ်မှာ ဆူပူမှုတွေ ဖြစ်လာနိုင်တယ်လို့ ကျွမ်းကျင်သူတွေကလည်း သုံးသပ်နေပါတယ်။ မျက်မြင်တွေ့လိုက်ရတဲ့ ဒေသခံတွေရဲ့အဆိုအရ Mswati III ဟာ BUW ကား ဒါဇင်နဲ့ချီကို နယ်စပ်ကနေ ဖြတ်ကျော်ဆောင်ယူခဲ့စေကြောင်း သိရပါတယ်။

 

အတိုက်အခံ နိုင်ငံရေးခေါင်းဆောင် Wandile Dludlu ကတော့ ဘုရင်ဟာ သူကော၊ သူ့မိသားစုကိုကော ဖျက်လိုဖျက်ဆီးလုပ်နေတာဖြစ်ကြောင်း၊ ယခင်ကလည်း အကြိမ်ကြိမ်လုပ်ခဲ့သလို၊ အခုလည်း ဆက်လုပ်နေတယ်လို့ စွပ်စွဲခဲ့ပါတယ်။

Dludlu က “ ဆိုရရင် ဒီကိစ္စဟာ သူတို့ တလွဲဆံပင်ကောင်းနေတဲ့ကိစ္စကို ဝရုန်းသုန်းကား ဖော်ပြလိုက်တာပါဘဲ … နောက်ပြီး အလွန်ဆင်းရဲတဲ့ပြည်သူတွေကို လုံးဝ လစ်လျှူရှု ထင်ရာစိုင်းခဲ့တာဖြစ်ပြီး … သူ့ကိုယ်သူ သေးသိမ်သွားအောင် လုပ်ရာရောက်တယ် ”လို့ ပြောခဲ့ပါတယ်။

Dludlu က ဆက်လက်ပြီး “ ပြောရရင်တော့ ပြည်သူကို ဆဲတာနဲ့ အတူတူပါဘဲ … သူဟာ ဥပဒေဖြစ်ပြီး သူ့ဥပဒေကို ကြိုက်သလို ချိူးဖောက်လို့ရတယ်ဆိုတာ ဗြောင်ကျကျ သက်သေပြလိုက်တာ … ”လို့ ပြောခဲ့ပါတယ်။ Forbes ရဲ့အဆိုအရတော့ အသက်(၅၁)နှစ်အရွယ် ဘုရင် Mswati III မှာ ဇနီး(၁၄)ယောက်နဲ့အတူ ရထားတဲ့ ကလေး(၂၃)ယောက် ရှိတယ်လို့ သိပါတယ်။

နောက်ပြီး သူရဲ့ ဘဏ်အကောင့်ထဲမှာ ပေါင်သန်း(၁၈၀)လောက် ရှိတယ်လို့ သိရပါတယ်။ ကားတွေ အထပ်လိုက်ကြီး သယ်လာတဲ့ ဓာတ်ပုံတွေကို လူသိထင်ရှားတဲ့ ဂျာနစ်လစ် Mzilikazi wa Afrika က အများပြည်သူသိအောင် မျှဝေခဲ့ပြီး၊ ဒီပုံတွေကို မြင်ရတော့ ဆင်းရဲတဲ့ပြည်သူတွေကိုယ်စား စိတ်မကောင်းဘူးလို့ ပြောပါတယ်။

Mzilikazi က “ Eswatini (ဆွာဇီလန်နိုင်ငံ၏ တရားဝင်နာမည်)ရဲ့ စီးပွားရေးက စိန်ခေါ်မှုတွေ ရင်ဆိုင်နေရချိန်မှာ … မနေ့တုန်းက ဘုရင်က သူရဲ့ဇနီးတွေအတွက် အလွန်တန်ဖိုးကြီးတဲ့ အရာတွေကို ဝယ်ပေးခဲ့တယ် … ဒါဟာ ဘုရင်အနေနဲ့ သိပ်ရှက်စရာကောင်းတဲ့ အလုပ်ပေါ့ … ”လို့ ပြောခဲ့ပါတယ်။

ဆွာဇီလန်နိုင်ငံရဲ့ မူလနာမည်ကို တိုင်းပြည်ရဲ့ အနှစ်(၅၀)မြောက်လွတ်လပ်ရေးနေ့မှာ လက်ရှိဘုရင် Mswati III က Eswatini လို့ အမည်ပြောင်းလဲခဲ့တာ ဖြစ်ပါတယ်။ ဒေသခံဘာသာစကားရဲ့ အဓိပ္ပါယ်မှာတော့ Eswatini ဟာ “ဆွာဇီလူမျိုးတို့ရဲ့နိုင်ငံ”လို့ ဆိုပါတယ်။ အဲဒီလွတ်လပ်ရေးနေ့မှာ ဘုရင် Mswati III က သူရဲ့ (၅၀)နှစ်မြောက်မွေးနေ့ကိုလည်း ဆင်နွှဲခဲ့ပါတယ်။

လင်းဇော်ကို

SHARE