ရုံးပိတ်ရက်မှာ စိတ်အပန်းပြေဖို့အတွက် ဒါလေးတွေလုပ်ကြမယ်

Goran Djukanovic/Shutterstock

မကြာခင် သီတင်းကျွတ်ရုံးပိတ်ရက် ရောက်တော့မယ်ဆိုတော့ ပိတ်ရက်မှာ ဘာတွေလုပ်ကြမယ်ဆိုတာ စိတ်ကူးထားပြီးကြပြီလား။ အလုပ်လုပ်နေကြရသူတွေအတွက်တော့ ဒီလို ပိတ်ရက်ရှည်တွေမှာ ကောင်းကောင်းနားလိုက်မယ်လို့ အားခဲထားကြမှာပါ။ ဒါပေမယ့် တကယ်တမ်း ပိတ်ရက်တွေလည်းရောက်လာရော၊ ဟိုလုပ် ဒီလုပ်နဲ့ ရုံးပြန်တက်ချိန်သာရောက်လာတယ်၊ ကောင်းကောင်းမနားလိုက်ရဘူးဆိုတာမျိုး ဖြစ်သွားပါရောလား။ ဒီတော့ ပိတ်ရက်ရှည်မှာ ကိုယ်ဘာတွေလုပ်မလဲဆိုတာ ကြိုပြီး စဉ်းစားထားကြဖို့လိုပြီလေ။

တကယ်လို့ မစဉ်းစားထားရသေးဘူးဆိုရင် ရုံးပိတ်ရက်မှာ စိတ်အပန်းပြေဖို့ ဒါလေးတွေ လုပ်ကြည့်ကြပါလား။

(၁)။ ခရီးထွက်မယ်

ပုံမှန်ရုံးပိတ်ရက်တွေမှာ ခရီးထွက်ဖို့ဆိုတာ ခွင့်ယူမှပဲ ရမှာဖြစ်ပေမယ့် အခုလို ရုံးပိတ်ရက်ရှည်တွေမှာတော့ အေးအေးလူလူ ခရီးထွက်လို့ရမှာပါ။ အလုပ်ထဲက ဖိအားတွေ၊ ပင်ပန်းတာတွေကိုလျော့ကျစေဖို့နဲ့ စိတ်အပန်းပြေစေဖို့အတွက် ခရီးထွက်တာက အကောင်းဆုံးပဲဖြစ်ပြီး သင်သွားချင်တဲ့ ခရီးစဉ်တစ်ခုကိုသာ အမြန်ဆုံး ဖန်တီးလိုက်ပါ။

Anntuan/Shutterstock

(၂)။ ကိုယ်ကြည့်ချင်တဲ့ရုပ်ရှင်ကားတွေ တစ်ဝကြီးကြည့်မယ်

ရုံးတက်ရက်တွေမှာ အလုပ်ကနေ ပြန်တာနောက်ကျလို့ပဲဖြစ်ဖြစ်၊ အိမ်ရောက်တဲ့အခါ ပင်ပန်းတာကြောင့်ပဲဖြစ်ဖြစ် ကိုယ်ကြည့်ချင်တဲ့ ရုပ်ရှင်ကားတွေ မကြည့်ဖြစ်ဖူးဆိုရင် ပိတ်ရက်မှာ ဘာမှမလုပ်ပဲ ရုပ်ရှင်ကားတွေသာ ထိုင်ကြည့်နေလိုက်ပါ။ တကယ်ပါ။ ဘာဆို ဘာမှမလုပ်နဲ့။ စားတာသောက်တာနဲ့ အိပ်တာအပြင် ဘာမှမလုပ်ပဲ ရုပ်ရှင်ကားတွေသာ ထိုင်ကြည့်နေလိုက်။ သင်သာ တကယ်ပဲ ရုပ်ရှင်ချစ်သူ တစ်ယောက် ဖြစ်တယ်ဆိုရင် အဲဒီလို လုပ်ရတာ ဘယ်လောက်တောင် အပန်းပြေသလဲဆိုတာ သိမှာပါ။

READ
သူနဲ့ကိုယ်ပြတ်ဆဲတော့မယ်ဆိုတာ သိသာစေတဲ့အချက်လေးတွေ
Anntuan/Shutterstock

(၃)။ စာအုပ်တွေဖတ်မယ်

ကိုယ်ဖတ်ချင်တဲ့စာအုပ်တွေကို ပိတ်ရက်မတိုင်ခင်ကတည်းက ကြိုစုထားပြီး ပိတ်ရက်ရောက်တဲ့အခါ တစ်ဝကြီး ထိုင်ဖတ်နေတာကလည်း တကယ့်ကို အနှစ်ပါ။ နေပူပူထဲမှာ အပြင်ကို လျှောက်မလည်ပဲ အိမ်မှာပဲ ကော်ဖီလေးသောက်လိုက်၊ မုန့်လေးစားလိုက်၊ ကိုယ်ဖတ်ချင်တဲ့စာအုပ်လေးတွေ ဖတ်နေလိုက် လုပ်နေရတဲ့အချိန်တွေဟာ ဘာနဲ့မှ မတူဘူးဆိုတာ ပြောဖို့တောင် လိုမယ်မထင်ပါဘူး။

(၄)။ စားချင်တာတွေ ချက်စားမယ်

အလုပ်လုပ်နေရတဲ့ရက်တွေမှာ ကိုယ်စားချင်ပေမယ့် မအားလို့ ချက်မစားနိုင်တဲ့ အစားအသောက်တွေလည်းရှိမှာပါ။ ကဲ…အခုလို ပိတ်ရက်ရှည်တွေမှာ တစ်ပတ်စာလောက် ဈေးဝယ်ထွက်၊ စားချင်တာတွေ ရေခဲသေတ္တာထဲ ထည့်ထားပြီး တစ်မျိုးပြီးတစ်မျိုး ချက်ပြုတ်စားသောက်နေတာကလည်း တကယ့်ကို စိတ်ဖိစီးမှုတွေ လျော့ကျစေတာပါ။ ဟင်းချက်တာကို ၀ါသနာပါသူတွေအတွက်ကတော့ အဲဒီလို ဟင်းချက်နေရရင် အချိန်ကုန်လို့ ကုန်သွားမှန်းမသိဖြစ်တတ်ပြီး စိတ်အေးလက်အေးနဲ့ ချက်ပြုတ်ရတော့ အသစ်အဆန်းလေးတွေကိုပါ ဖန်တီးကြည့်လို့ရတယ်လေ။

READ
ကိုယ်ပိုင်အလုပ် လုပ်တော့မယ်ဆိုရင် သိထားသင့်တဲ့အချက်များ
Goran Djukanovic/Shutterstock

(၅)။ အလုပ်ကိစ္စတွေအားလုံးမေ့ထားမယ်

ပိတ်ရက်မှာ အလုပ်ကိစ္စတွေ အားလုံးမေ့ထားတာကလည်း စိတ်အပန်းဖြေနည်းတစ်မျိုးပါပဲနော်။ ကိုယ့်မှာ ရုံးပိတ်ရက်သာ ရောက်နေပေမယ့် အချိန်ပိုအလုပ်တွေ လုပ်နေရတာ၊ ရုံးပြန်ဖွင့်ရင် လုပ်ရမယ့် ကိစ္စတွေအတွက် စီမံနေရတာ၊ အဲဒါမျိုးတွေဆိုရင် ရုံးပိတ်ရက်တွေက ဘာမှ တန်ဖိုးရှိမှာမဟုတ်ပါဘူး။ ဒီတော့ ရုံးပိတ်ရက်ရှည်တွေရတုန်း အလုပ်အီးမေးလ်တွေ၊ အထက်လူကြီးတွေနဲ့ စကားပြောရတာတွေ၊ အားလုံးကို ရပ်ထားလိုက်ပါ။ ဖြစ်နိုင်ရင် ရုံးဆိုတာကြီးကို ဦးနှောက်ထဲကနေ ခဏလောက် ထုတ်ထားလိုက်ပါ။ ပြီးရင် ကိုယ်ဝါသနာပါရာ ကိစ္စတွေကို ပျော်ပျော်ကြီးလုပ်ရင်း ရုံးပိတ်ရက်တွေကို ဖြတ်သန်းလိုက်ပါနော်။

Linn

 

SHARE