ရုံးပိတ်ရက်ရှည်တွေကို အကျိုးရှိရှိ ဘယ်လိုအသုံးချကြမလဲ

Shutterstock

မကြာခင် ရုံးပိတ်ရက်ရှည်တွေ လာတော့မယ်နော်။ ခရစ္စမတ်ရုံးပိတ်ရက်တွေ ၊ နှစ်သစ်ကူးရုံးပိတ်ရက်တွေကြားမှာ ကိုယ်တွေလို ရုံးဝန်ထမ်းတွေအတွက် ပျော်စရာတွေ ဖြစ်လာတော့မှာပါ။ ဒါက ပင်ပန်းထားသမျှကို အနားယူရတော့မယ့်အချိန်တွေဖြစ်ပြီး ကိုယ့်အတွက် အကျိုးရှိတာ တစ်ခုခုကို လုပ်ဖို့ စဉ်းစားရမှာပါ။

များသောအားဖြင့်တော့ ရုံးပိတ်ရက်တွေက ဘာမှလည်း ထူးထူးခြားခြားမလုပ်လိုက်ရပဲ ကုန်ဆုံးသွားတာပါ။ အိမ်မှာပဲ ဟိုလှည့်ဒီလှည့်လုပ်နေရင်း၊ သူငယ်ချင်းတွေနဲ့ လျှောက်သွားနေရင်းက ရုံးပိတ်ရက်တွေကုန်သွားပြီး ရုံးပြန်တက်ရတဲ့ဘ၀ ပြန်ရောက်သွားတာလေ။ ဒီတော့ ရုံးပိတ်ရက်ရှည်တွေကို အကျိုးရှိရှိ ဘယ်လို အသုံးချကြမလဲဆိုတာ သိချင်အောင် အောက်မှာပါတဲ့အချက်လေးတွေကို ဖတ်ကြည့်လိုက်နော်။

(၁)။ ခရီးရှည်တစ်ခုသွားမယ်

ပုံမှန်ရုံးပိတ်ရက်တွေမှာ သွားလို့မရတဲ့ ခရီးရှည်တစ်ခုလောက် သွားဖို့ ပြင်ဆင်ကြည့်ပါလား။ တောင်တက်တဲ့ ခရီးတစ်ခုပဲဖြစ်ဖြစ်၊ ဒါမှမဟုတ် ကိုယ်သွားတဲ့နေရာမှာ (၂)ရက် (၃)ရက်လောက် နေလို့ရတဲ့ ခရီးလေးပဲဖြစ်ဖြစ်ပေါ့။ အလုပ်နဲ့ ပတ်သက်တာတွေ အားလုံးမေ့ထားပြီး စိတ်သစ်၊ လူသစ်နဲ့ နေရာသစ်မှာ လုံးဝကို အနားယူလိုက်တာကလည်း အပြောင်းအလဲလေး ဖြစ်သွားစေပါလိမ့်မယ်။

READ
လူငယ်တွေကို လူကြီးတွေသိစေချင်တဲ့အချက်(၇)ချက်

(၂)။ ရုပ်ရှင်ကားတွေ တ၀ကြီးကြည့်မယ်

ကိုယ်ကြည့်ချင်နေပြီး မကြည့်ဖြစ်သေးတဲ့ ဇာတ်လမ်းတွဲတွေ၊ ရုပ်ရှင်တွေရှိရင် ပိတ်ရက်မှာ အဲဒါတွေကြည့်ရင်း အချိန်ဖြုန်းလိုက်ပါလား။ ကိုယ်စားချင်တာလေးတွေ ဘေးနားမှာ ၀ယ်ထားပြီး အိမ်မှာ အေးဆေးနှပ်ရင်း ရုပ်ရှင်ကားလေးတွေကြည့်နေတာကလည်း သင့်ရဲ့စိတ်ကို အပြောင်းအလဲဖြစ်သွားနိုင်သလို ပိတ်ရက်မှာ အပန်းဖြေပြီးသားလည်း ဖြစ်သွားပါလိမ့်မယ်။

Shutterstock

(၃)။ အိပ်ရေး၀၀အိပ်မယ်

ပိတ်ရက်ရှည်ကြီးမှာ အိပ်ရေး၀၀အိပ်ဖို့ လာပြီး တိုက်တွန်းနေတယ်ဆိုရင် ရယ်စရာကြီးများ ဖြစ်နေမလား မသိဘူးနော်။ ဒါပေမယ့် ပုံမှန်ရုံးတက်ရက်တွေမှာ မနက်စောစောထရတာချည်းပဲမို့ အိပ်ရေးဝတဲ့ ရက်တွေက အနည်းငယ်သာ ရှိတာပါ။ စိတ်မကြည်မလင်နဲ့ နိုးခဲ့ရတဲ့ မနက်တွေလည်း များလှပြီမို့ ရုံးပိတ်ရက်တွေရှိတုန်း အိပ်ယာက နောက်ကျမှသာထ၊ အိပ်ရေးဝအောင်သာ အိပ်လိုက်ပါ။ အနည်းဆုံးတော့ အိပ်ရေးဝတာကြောင့် စိတ်လည်း ကြည်လင်လာမှာဖြစ်ပြီး ရုံးပြန်တက်ရတဲ့အချိန်မှာ စိန်ခေါ်မှုအသစ်တွေနဲ့ ရင်ဆိုင်နိုင်မှာ သေချာတယ်လေ။

READ
ကားတစ်စီးဝယ်မယ်ဆိုရင် ပြင်ဆင်ထားသင့်တဲ့အချက်များ
Shutterstock

(၄)။ မိသားစုအတွက်အချိန်ပေးမယ်

ရုံးတက်ရတဲ့ရက်တွေမှာ မနက်ဆို အစောကြီး အိမ်ကထွက်သွား၊ ညဆိုလည်း မိုးချုပ်မှ ပြန်ရောက်လာနဲ့ မိသားစုအတွက် အချိန်မပေးနိုင်ပဲ ဖြစ်နေခဲ့တယ်မို့လား။ ဒီတော့ ရုံးပိတ်ရက်ရှည်တွေရှိတုန်း မိသားစုအတွက် အချိန်ပေး၊ အိမ်မှာ တစ်ခုခု လုပ်စားတာပဲဖြစ်ဖြစ်၊ တစ်နေရာရာသွားတာပဲဖြစ်ဖြစ်လုပ်။ မိသားစုနဲ့ အတူရှိနေပြီး ပျော်ရွှင်နေရတာက သင့်အတွက် ခွန်အားအသစ်တွေ ဖြစ်လာမှာပါနော်။

Shutterstock

(၅)။ အစီအစဉ်တစ်ခုဆွဲပါ

ရုံးပိတ်ရက်ရှည်ရောက်ရင် ဘာတွေလုပ်မလဲဆိုတဲ့ အစီအစဉ်တစ်ခု အရင်ဆုံးဆွဲလိုက်ပါ။ ပုံမှန်အချိန်တွေမှာ မလုပ်ဖြစ်ခဲ့တာတွေ၊ စားချင်ပေမယ့် မစားခဲ့ရတာတွေ၊ သွားချင်ပေမယ့် မသွားနိုင်ခဲ့တဲ့နေရာတွေကို စာရင်းထဲ ထည့်ပါ။ စာရင်းက သင် လုပ်နိုင်တာထက်တော့မပိုပါစေနဲ့။ ပြီးသွားရင်တော့ အဲဒီထဲက သင်လုပ်ချင်တဲ့ ကိစ္စတွေကို တစ်ခုပြီးတစ်ခု အကောင်အထည်ဖော်ပါ။ ဒီနည်းလမ်းကလည်း အားလပ်ရက်ကို အဓိပ္ပာယ်ရှိရှိ ဖြတ်သန်းနိုင်တဲ့ နည်းလမ်းတစ်ခုဖြစ်ပြီး သင့်ကိုယ်သင် ယုံကြည်မှုလည်း ပိုတိုးလာပါလိမ့်မယ်။

Linn

SHARE