သွေးစစ်ခြင်းကနေ ရင်သားကင်ဆာကို(၅)နှစ်စောပြီး ကြိုတင်သိရှိနိုင်တော့မည်

Photographee.eu/Shutterstock

ရင်သားကင်ဆာဟာ အမျိူးသမီးတွေအတွက်တော့ အလွန်ကြောက်ရ စိုးရိမ်ရတဲ့ ရန်သူတော်တစ်ပါး ဖြစ်ပါတယ်။ ကင်ဆာရဲ့ထုံးစံအတိုင်း အများအားဖြင့် ရောဂါလက္ခဏာတွေ သိသိသာသာ ပြလာတဲ့အချိန်မှာ သိရတာများတဲ့အတွက်၊ တကယ်တမ်း ဒေါက်တာတွေနဲ့တိုင်ပင်တဲ့အခါ ‘လွန်’နေချိန် ဖြစ်နေတတ်ပါတယ်။

အခု သတင်းကတော့ သွေးစစ်ရုံနဲ့ ရင်သားကင်ဆာရဲ့ ရောဂါလက္ခဏာတွေမပြခင် (၅)နှစ်လောက်ကြိုပြီး သိနိုင်တော့မယ့်အဖြစ်ပါ။ ဒါဟာ အမျိုးသမီးတွေအတွက် သတင်းကောင်းဖြစ်ပါတယ်။ သို့သော်လည်း အမျိုးသားတစ်ချို့မှာလည်း ရင်သားကင်ဆာ ဖြစ်နေတာမျိုးတွေ ရှိပါတယ်။ အလွန်နည်းပါးတဲ့ အရေအတွက်သာ ရှိသေးတာလို့ သိရပါတယ်။

Rido/Shutterstock

ဘယ်လိုပဲဖြစ်ဖြစ် အခု သွေးစစ်ရုံနဲ့ ရင်သားကင်ဆာဖြစ်နိုင်မဖြစ်နိုင် သိဖို့နည်းကတော့ စမ်းသပ်အောင်မြင်နေပြီလို့ သိရပါတယ်။ မကြာတော့မယ့် (၄)နှစ်လောက် အတောအတွင်းမှာပဲ ဒီနည်းကို တွင်တွင်ကျယ်ကျယ် အသုံးပြုနိုင်ဖို့ ရှိနေပါတယ်။ သွေးကို စစ်ခြင်းက ရင်သားကင်ဆာ ဖြစ်နိုင်မဖြစ်နိုင်သိဖို့ဆိုတာ အရမ်းကြီး မခက်ဘူးလို့လည်း သိရပါတယ်။

ဆိုရရင် ရင်သားကင်ဆာမတိုင်ခင် နှစ်များစွာကတည်းက ကင်ဆာဆဲလ်တွေဟာ အလွန်မသိသာတဲ့ ဓာတ်ပစ္စည်းတွေထဲကို သွေးစနစ်ထဲကို ထုတ်လွှတ်ကြောင်း၊ ဒီသွေးစနစ်ထဲကိုရောက်လာတဲ့ ကင်ဆာဓာတ်ပစ္စည်းတွေကို ခန္ဓာကိုယ်ကနေထုတ်လွှတ်တဲ့ သဘာဝကာကွယ်ရေးစနစ်တွေက တိုက်ဖျက်နိုင်ခြင်းရှိမရင်ကို သွေးစစ်ခြင်းနဲ့ ခြေရာခံတိုင်းတာတယ်လို့ သိရပါတယ်။

ESB Professional/Shutterstock

ဒီလို ကနဦးတိုင်းတာခြင်းတွေဟာ လူတစ်ယောက်အတွက် သို့မဟုတ် အမျိုးသမီးတစ်ယောက်ရဲ့ အသက်ရှင်သန်ရေးအတွက်လည်း အထူးအရေးပါကြောင်း သိရပါတယ်။ ဒီစနစ်ကို စတင်စမ်းသပ်ခဲ့တဲ့ သိပ္ပံပညာရှင်တွေကတော့ University of Nottingham တက္ကသိုလ်မှ Centre of Excellence for Autoimmunity in Cancer ဌာနမှဖြစ်ပြီး၊ အောင်မြင်တဲ့ စမ်းသပ်စစ်ဆေးမှုရလဒ်တွေကို အကောင်အထည်ဖော်နိုင်ခဲ့ပြီ ဖြစ်ပါတယ်။

ယင်းဌာနရဲ့ PhD ကျောင်းသားတစ်ဦးဖြစ်တဲ့ Daniyah Alfattani က “ ဒီရလဒ်တွေက ရင်သားကင်ဆာမဖြစ်ခင် ဖြစ်တန်ခြေ အလားအလာရှိတဲ့ ရောဂါလက္ခဏာတွေကို ညွှန်ပြနေပါတယ် … အခု ကျွန်တော်တို့ ဒီစမ်းသပ်မှုကို တိကျမှန်ကန်အောင် လုပ်ထားနိုင်ပါပြီ … သွေးစစ်ရုံနဲ့ ရောဂါမဖြစ်ခင် အခြေအနေတွေရဲ့ ဖြစ်တန်စွမ်းတွေကို တွက်ချက်ပေးတာပါ ”လို့ ပြောခဲ့ပါတယ်။

CI Photos/Shutterstock

Centre of Excellence for Autoimmunity in Cancer ဌာနမှ သိပ္ပံပညာရှင်တွေဟာ သူတို့ရဲ့စမ်းသပ်မှုကို ရင်သားကင်ဆာ ခံစားနေရတဲ့ အမျိူးသမီး(၉၀)နဲ့ ရင်သားကင်ဆာမဖြစ်သေးတဲ့ အမျိုးသမီးက(၉၀)ကို ကနဦးစမ်းသပ်ခဲ့တာဖြစ်ပြီး၊ အခုဆိုရင် အမျိုးသမီး(၈၀၀)ကို ဆက်လက်စမ်းသပ်စစ်ဆေးနေပါတယ်။ ဒီကနေ ပိုကောင်းတဲ့ရလဒ်တွေ ရလာမယ်လို့ မျှော်လင့်ရပါတယ်။

နောက်ပြီး ၎င်းသိပ္ပံပညာရှင်အဖွဲ့ဟာ အခုလို သွေးစစ်ခြင်းဖြင့် ပန်ကရိယကင်ဆာ၊ အူမကြီးကင်ဆာနဲ့ အသည်းကင်ဆာ စတဲ့ရောဂါတွေအတွက်လည်း စမ်းသပ်စစ်ဆေးမှုတွေ ပြုလုပ်နေပါတယ်။ ဆက်လက်တွေ့ရှိချက်တွေကို ဂလက်စကိုမှာ ကျင်းပတဲ့ National Cancer Research Institute အစည်းအဝေးမှာ ထည့်သွင်းဆွေးနွေးခဲ့ကြကြောင်း Telegraph သတင်းဌာနရဲ့ ဖော်ပြချက်အရ သိရပါတယ်။

လင်းသုတ

SHARE