တစ်နှစ်မှာ ရက်ပေါင်း (၂၇၀) လောက် နှင်းကျနေတဲ့ ကမ္ဘာ့အအေးဆုံးမြို့လေး

tumblr

မြောက်ကမ္ဘာခြမ်းဆိုတာ အမြဲတမ်းနှင်းတွေကျပြီး ဆောင်းရာသီရဲ့ အရသာကို ပီပီပြင်ပြင်ခံစားနိုင်တဲ့ နိုင်ငံတွေရှိတဲ့ အရပ်ဒေသတစ်ခုပါ။ ဆီးနှင်းတွေ တဖွဲဖွဲကျနေပြီး အမြဲတမ်းလည်း ရေခဲနေတဲ့ ဒေသတွေရှိတဲ့ အရပ်ဒေသတွေပါ။

အဆိုပါ မြောက်ကမ္ဘာခြမ်းက မြို့တစ်မြို့ကတော့ ထူးခြားတဲ့ မြို့ငယ်လေးတစ်မြို့ပါ။ ရုရှားနိုင်ငံရဲ့ နယ်နိမိတ်အတွင်းမှာ တည်ရှိပြီး နာမည်ကတော့ Norilsk လို့ ခေါ်တဲ့ မြို့လေးပါ။ အဲဒီမြို့လေးဟာ  တစ်ချိန်လုံးနေရောင်မမြင်ရဘဲ အမြဲဆီးနှင်းတွေကျနေတဲ့ မြို့ငယ်လေးပါ။ နှစ်တစ်နှစ်ရဲ့ ဇန်နဝါရီလအလည်လောက်မှာပဲ နေကို ပီပီပြင်ပြင်ကို မြင်ရတာပါ။ ကျန်တဲ့အချိန်တွေကတော့ နေကို မမြင်ရဘဲ အမြဲ အုံ့ဆိုင်းနေတတ်တဲ့ ကဗျာဆန်ဆန်မြို့လေးပါ။ နေရောင်ခြည်လုံလုံလောက်လောက်မရလို့ အသက်ရှင်နေထိုင်ဖို့အတွက် ခက်ခဲကြမ်းတမ်းတဲ့ မြို့တစ်မြို့လို့ သတ်မှတ်ထားကြပေမယ့် ကမ္ဘာ့အအေးဆုံးမြို့လေးတစ်မြို့အဖြစ်ရှိနေခဲ့တာပါ။

Unsplash/Baren

Norilsk မြို့လေးရဲ့ လူဦးရေဟာ လူပေါင်း (၁)သိန်း (၇)သောင်းကျော်ရှိပြီး ဧည့်ဝင်ဧည့်ထွက်များပြားလှတဲ့ မြို့တစ်မြို့ဖြစ်တာကြောင့်လည်း ပုံမှန်အားဖြင့် လူဦးရေ (၂) သိန်းဝန်းကျင်လောက် နေထိုင်နေကြပါတယ်။ Norilsk မြို့လေးဟာ အာတိတ်စက်ဝိုင်းထဲမှာ ရှိတဲ့ မြို့တွေထဲမှာ ဒုတိယမြောက်လူဦးရေအများဆုံးနေထိုင်တဲ့ မြို့တစ်မြို့ဖြစ်ပါတယ်။ ပထမလူဦးရေအများဆုံးမြို့ကတော့ Yakutsk ဆိုတဲ့မြို့လေးပါ။

Norilsk မြို့လေးဟာ တစ်နှစ်မှာ ရက်ပေါင်း ၂၇၀ လောက်ဆီးနှင်းတွေကျနေတတ်ပါတယ်။ ပြီးတော့ သုံးရက်တစ်ခါလောက် နှင်းမုန်တိုင်းတွေရဲ့ တိုက်ခိုက်မှုကို ခံရလေ့ရှိတဲ့ အရပ်ဒေသတစ်ခုပါ။ Norilsk မြို့လေးကို သွားမယ်ဆိုရင်တော့ ရုရှားနိုင်ငံရဲ့ မြို့တော် မော်စကိုကနေ သွားလို့ရပြီး မိုင်ပေါင်း ၁,၈၀၀ လောက် သွားရမှာပါ။ ကားလမ်းခရီးလို့မရှိဘဲ Boat တွေ၊ လေယာဉ်ပျံတွေနဲ့သာ သွားလို့ရမှာပါ။ လမ်းခရီးတစ်လျှောက်လုံး အရိုင်းဆန်ပြီး လူသူမနေရဲလောက်တဲ့ ရာသီဥတုကြမ်းတွေကို ဖြတ်သန်းသွားရမှာပါ။ အာတိတ်စက်ဝိုင်းနဲ့ဆိုရင် အတော်နီးနီးကပ်ကပ်ရှိနေပြီး အာတိတ်စက်ဝိုင်းနဲ့ မိုင် ၂၀၀ လောက်ပဲ ဝေးပါတယ်။

Unsplash/Siber

ဒီမြို့လေး ရောက်သွားရင် ကမ္ဘာနဲ့ မသက်ဆိုင်တဲ့ အရပ်ဒေသတစ်ခုကို ရောက်သွားသလို ခံစားသွားရတယ်လို့ အဆိုပါ မြို့လေးကို သွားရောက်ခဲ့ဖူးသူတို့က ပြောပါတယ်။ တစ်ခုတည်းသောမြို့လေးဆိုပေမယ့်လို့ အဲဒီမြို့ငယ်လေးဟာ တခြားမြို့တွေလိုပါပဲ။ဘားတွေ၊ ကဖေးဆိုင်တွေ၊ ဘုရားရှိခိုးကျောင်းတွေ၊ အနုပညာပြခန်းတွေ၊ ပြဇာတ်ရုံတွေ ရှိပါတယ်။ နှစ်စဉ်လိုလို အဲဒီမြို့လေးမှာ လာရောက်အခြေချ နေထိုင်သူတွေလည်း တစ်နှစ်ထက် တစ်နှစ်တိုးလာခဲ့တာပါ။

ဒီလောက် ရာသီဥတုခက်ခဲကြမ်းတမ်းတဲ့ အရပ်ဒေသကို လူတွေ များစွာ ဘာကြောင့်လာရောက်ကြသလဲဆိုတော့ ပိုက်ဆံရှာဖွေဖို့အတွက်ပါ။  Norilsk မြို့လေးဟာ နီကယ်လ်၊ ပလက်တီနမ်သိုက်တွေ များစွာရှိတယ်လို့ နယူးယောက်တိုင်းမ်သတင်းစာကဆိုထားပါတယ်။ Norilsk မြို့ဟာ ရုရှားနိုင်ငံတွင်းမှာ ရှိတဲ့ အချမ်းသာဆုံးမြို့လေးတစ်မြို့ဖြစ်နေပါတယ်။

လွန်ခဲ့တဲ့ ၂၀ ရာစုကတော့ ရုရှားအစိုးရဟာ ထောင်သားတွေ၊ ရာဇဝတ်သား ၆သိန်းလောက်ကို ကို ဒဏ်ပေးတဲ့ အနေနဲ့ အဲဒီ မြို့လေးဆီကို သတ္ထုတူးဖော်ခိုင်းခဲ့တာပါ။ အခုအချိန်မှာတော့ အဲဒီလိုတွေမရှိတော့ပေမယ့် သတ္ထုတူးဖော်ရေးလုပ်ငန်းတွေဟာ တည်ရှိနေဆဲပါ။။ Norilsk မြို့က ရတဲ့ ဝင်ငွေဟာ ရုရှားနိုင်ငံတစ်နိုင်ငံလုံးရဲ့ GDP ပမာဏကို ၂ ရာခိုင်နှုန်းအထိ ဖြည့်စွမ်းနိုင်ခဲ့တာပါ။

Ye Yint Kyaw

SHARE