ပြင်ဆင်စည်းကမ်းအချို့နဲ့အတူ ဝန်ထမ်းတွေကို တစ်ရက် (၅)နာရီပဲအလုပ်ဆင်းစေတဲ့ ကုမ္ပဏီ

Twitter/Rhingans Gigital Enabler

ဂျာမန်အခြေစိုက် ကုမ္ပဏီတစ်ခုဟာ ဝန်ထမ်းတွေကို တစ်ရက်မှာ အလုပ်ချိန် (၅)နာရီပဲ ဆင်းခိုင်းတယ်လို့ Business Insider မဂ္ဂဇင်းက ဆိုပါတယ်။ ဒါပေမယ့် ရုံးစည်းကမ်းနဲ့ပတ်သက်ပြီး ပြင်ဆင်သတ်မှတ်ချက်တွေလည်း ရှိခဲ့ပြီး၊ သာမန်အားဖြင့်တော့ လိုက်နာဖို့ ခက်ခဲတဲ့ စည်းကမ်းတွေတော့ မဟုတ်ပါဘူး။

ဝန်ထမ်းတွေအနေနဲ့ တစ်ရက်ကို (၅)နာရီအနည်းဆုံး အလုပ်ချိန်ပေးရမှာ ဖြစ်ပြီး၊ ဖုန်းပြောဆိုခြင်း၊ ဝန်ထမ်းအချင်းချင်း စကားစမြည်ပြောဆိုခြင်းကို လုံးဝ ပိတ်ပင်လိုက်ပါသတဲ့။ သာမန်အလုပ်ခွင်မျိုးမှာ ဆင်းနေရသူများအဖို့ ဒီစည်းကမ်းချက်တွေဟာ လိုက်နာဖို့ ခဲယဉ်းမှာပါ။ သို့သော်လည်း တစ်ဖက်က ကြည့်ရင်တော့ အချိန်(၅)နာရီသာဆိုတဲ့ မက်မောစရာ အလုပ်လုပ်ချိန်က နှစ်သက်စရာပါဘဲ။

Twitter/Rhingans Gigital Enabler

အဲဒီကုမ္ပဏီအမည်ကတော့ Rheingans Digital Enabler လို့အမည်ရပြီး Bielefeld မြို့အခြေစိုက် အထွေထွေအကြံဉာဏ်ပေးတဲ့ ကုမ္ပဏီတစ်ခု ဖြစ်ပါတယ်။ အဲဒီမှာ အကြီးအကဲရာထူးရယူထားတဲ့ အမျိုးသားကတော့ ကုမ္ပဏီရဲ့ အသစ်သတ်မှတ်ချက်တွေကို အလွန်သဘောကျနေပါတယ်။

Twitter/Rhingans Gigital Enabler

အလုပ်ချိန်က အလွန်နည်းပါးလို့ သူဟာ မိသားစုကို ပိုပြီးအချိန်ပေးနိုင်ခဲ့ပါတယ်တဲ့။ ကုမ္ပဏီမှာ လူမှုကွန်ရက်အသုံးပြုခွင့်ကိုလည်း ပိတ်ပင်ထားပြီး၊ ခြွင်းချက်အနေနဲ့ တစ်ရက်ကို မိမိကိုယ်ပိုင်အီးမေးလ်စစ်ဆေးဖို့ နှစ်ကြိမ် အခွင့်အရေးပေးပါသတဲ့။ အရေးကြီးတဲ့ အီးမေးလ်တွေကို အကြောင်းပြန်ဖို့ သီးခြားသတ်မှတ်ထားချိန် ရှိပါတယ်။

နောက်ပြီး ကုမ္ပဏီအတွင်းကျင်းပတဲ့ အစည်းအဝေးတွေကိုလည်း (၁၅)မိနစ်ထက် မပိုတဲ့ ကြာချိန်အတွင်းမှာ အပြီးလုပ်ရပါတယ်တဲ့။ ဒီနည်းအားဖြင့် အလုပ် ဘယ်လောက်တွင်ကျယ်မယ်ဆိုတာ တိတိကျကျ မသိရသေးသော်လည်း၊ သေချာပေါက်ကတော့ ဒီလိုအလုပ်မျိုးဟာ တိတ်ဆိတ်တဲ့ လုပ်ငန်းခွင်ကို နှစ်သက်သူတွေ၊ အစည်းအဝေး အချိန်အကြာကြီး တက်ရတာကို ပျင်းသူတွေအတွက် အကျိုးရှိစေမှာပါ။

လင်းဇော်ကို

SHARE