မျက်နှာပုံကို ရောင်းချရုံနဲ့၊ ဒေါ်လာ (၁၂၈၀၀၀)အထိ ရမယ့်အခွင့်အရေး

Twitter / NBC

နည်းပညာတွေ မြင့်မားလာတာနဲ့အမျှ သက်ဆိုင်ရာနယ်ပယ်အသီးသီးမှာ လူသုံးကုန်ပစ္စည်းတွေသာမက စက်ရုပ်အလုပ်ရုံတွေမှာ အသုံးပြုတဲ့ နည်းစနစ်တွေဟာ ပိုပြီး မြင့်မားလာပါတယ်။ လာမယ့်အနာဂတ်ကာလမှာ စက်ရုပ်တွေက လူသားအလုပ်သမားတွေအစား ဝင်ရောက်နေရာယူနိုင်တာမို့ အလုပ်အကိုင် ရှားပါးမှု ပြဿနာတွေကလည်း ရင်ဆိုင်လာရနိုင်ဖွယ် ရှိနေပါတယ်။

အခုဆိုရင် ကားထုတ်လုပ်ရေးစက်ရုံတွေကဲ့သို့သော နေရာတွေမှာ လူသားတွေအစား၊ အလိုအလျှောက်အလုပ်လုပ်တဲ့ စက်ရုပ်တွေ ထည့်သွင်းအသုံးပြုနေပြီ ဖြစ်ပြီး၊ ဒါဟာ စက်ရုပ်တွေ လူ့လောကအတွင်းမှာ တဖြည်းဖြည်းဝင်ဆန့်လာတဲ့ ဥပမာတစ်ခုသာ ဖြစ်ပါတယ်။ အခြားစက်ရုပ်တွေ၊ အလိုအလျှောက် အလုပ်လုပ်တဲ့ စက်တွေ အသုံးပြုနေတဲ့ လုပ်ငန်းတွေ အများကြီး ရှိလာခဲ့ပါပြီ။

အခုလည်း စက်ရုပ်ထုတ်လုပ်ရေး နည်းပညာကုမ္ပဏီတစ်ခုက လူသားမျက်နှာပုံစံတွေ အလိုရှိနေပါတယ်။ သူတို့ ထုတ်လုပ်မယ့် စက်ရုပ်တွေကို လူနဲ့အနီးစပ်ဆုံးတူအောင် ဖန်တီးချင်တဲ့ သဘောမျိုးဖြစ်ပါလိမ့်မယ်။ ကုမ္ပဏီနာမည်ကိုတော့ ဖော်ပြထားခြင်းမရှိဘဲ၊ Geomiq.com ကို အကူအညီတောင်းပြီး မျက်နှာပြင်နမူနာပုံစံတွေ အလိုရှိကြောင်း ကြေညာထားတာပါ။

သတ်မှတ်ချက်တွေကတော့ များများစားစား မဟုတ်ပါဘူး။ ပို့ပေးတဲ့မျက်နှာပုံက ကြင်နာဟန်ရှိပြီး၊ ခင်မင်ဖော်ရွေတဲ့ပုံစံမျိုး ဖြစ်နေရမယ်လို့ ဆိုပါတယ်။ ဒီလိုပဲ တကယ်လို့ ကိုယ့်မျက်နှာပုံသာ ရွေးချယ်ခံရပြီဆိုရင်တော့ သင့်မျက်နှာပုံနဲ့ စက်ရုပ်တွေဟာ ကမ္ဘာတစ်ခွင်မှာ ပျံ့နှံ့သွားဖို့ရှိပါတယ်။

ကုမ္ပဏီက သူတို့ထုတ်လုပ်မယ့် အရာတွေကို အသေးစိတ်ကြေညာထားခြင်း မရှိဘဲ၊ သက်ကြီးပိုင်း အဖိုးအဖွားတွေကို လူသားတွေအစား ပြုစုစောင့်ရှောက်ဖို့ အတွက် စက်ရုပ်တွေက Virtual friend သဘောမျိုးဝန်ဆောင်မှုပေးမယ့် သဘောမျိုးမှာ ရှိနေပါတယ်။ ဒီစက်ရုပ်တွေကိုတော့ လာမည့်နှစ်မှာ ထုတ်လုပ်ဖို့ရှိပါတယ်။

ရံပုံငွေကိုတော့ VCs ကုမ္ပဏီက ကျခံထားတယ်လို့ သိရပြီး၊ ဒီကုမ္ပဏီဟာ တရုတ်နိုင်ငံ၊ ရှန်ဟိုင်းမှာတော့ ထိပ်သီးကုမ္ပဏီကြီး ဖြစ်ပါတယ်။ ယခုစီမံကိန်းဟာ လွန်ခဲ့တဲ့(၅)နှစ်ကတည်းက စတင်ခဲ့တာဖြစ်ပြီး၊ ကုမ္ပဏီကတော့ အများပြည်သူအနေနဲ့လည်း သင့်တော်မယ့်မျက်နှာပုံစံမျိုးရှိရင် အကြံပြုကြဖို့ တိုက်တွန်းထားတယ်လို့ သိရပါတယ်။

လင်းသုတ

SHARE