ဖိလစ်ပိုင်နိုင်ငံ တောင်ပိုင်းက မြို့လေးတစ်မြို့ဟာ ပလတ်စတစ်ဘူးပေါင်း (၃) သောင်းနီးပါးကို အသုံးပြုကာ ပန်းဥယျာဉ်လေးတစ်ခု ဖန်တီးခဲ့ကြောင်း elitereaders သတင်းမှာ တွေ့ရှိရပါတယ်။ ၄င်းမြို့လေးဟာ လာမီတန်မြို့လေးဖြစ်ကာ ၄င်းပလတ်စတစ်ပန်းဥယျာဉ်ကိုတော့ Forever Tulip Garden လို့ အမည်ပေးထားပါတယ်။
အခုဆိုရင်တော့ Forever Tulip Garden လေးဟာ ကမ္ဘာလှည့်ခရီးသည် အမြောက်အမြား ၀င်ထွက်ရာနေရာလေးဖြစ်နေသလို အင်စတာဂရမ်ပေါ်မှာလည်း ကျော်ကြားလာတဲ့ နေရာလေးတစ်ခုဖြစ်နေပါပြီ။ လူတစ်ယောက်ရဲ့ အမှိုက်ဟာ တစ်ခြားသူအတွက် ရတနာလို့ ဆိုရိုးရှိပါတယ်။ လူတွေစွန့်ပစ်ထားတဲ့ ပလတ်စတစ်ဘူးခွံလေးတွေဟာ အခုဆိုရင် လှပတဲ့ ရောင်စုံပန်းဥယျာဉ်လေးအဖြစ် တန်ဖိုးရှိလာနေပြီပဲ ဖြစ်ပါတယ်။
တွေ့ရတဲ့ဓာတ်ပုံလေးကတော့ တျူးလစ်ပန်းဥယျာဉ်ကြီးရဲ့ ဓာတ်ပုံဖြစ်ပါတယ်။
တွေ့ရတဲ့ တျူးလစ်ပန်းတွေအကုန်လုံးကို ပလတ်စတစ်နဲ့ချည်းပဲ ပြုလုပ်ထားတာပါ။ ပလတ်စတစ်ဘူးခွံတွေကိုတော့ အစိုးရကနေ မြို့နားတစ်ဝိုက် ရွာပေါင်း(၄၅) ရွာကနေ စုစည်းကောက်ယူထားတာပါ။ ပလတ်စတစ်ဘူးခွံတွေကို ကောက်ယူ၊ တျူးလစ်ပန်းပုံစံလေးတွေဖြတ်ညှပ်ပြီး အရောင်စုံရအောင် အပေါ်ကနေ ဆေးထပ်ခြယ်ထားတာ ဖြစ်ပါတယ်။
တျူးလစ်ပန်းဥယျာဉ်လေးထဲကို ၀င်မယ့် ၀င်ကြေးကတော့ အခမဲ့ ဖြစ်ပါတယ်။ ဒါကြောင့် ဒေသခံတွေနဲ့ ကမ္ဘာလှည့်ခရီးသည်တွေဟာ တစ်ပြားတစ်ချပ်မှ ပေးစရာမလိုပဲ လူတွေပြုလုပ်ထားတဲ့ တျူးလစ်ဥယျာဉ်လေးရဲ့ အလှအပကို ခံစားနိုင်မယ့်အပြင် ဓာတ်ပုံလည်း ရိုက်နိုင်ပါသေးတယ်။ ပလတ်စတစ်တွေက လူတွေရဲ့ နေ့စဉ်ဘ၀မှာ စွန့်ပစ်ပစ္စည်းတွေအဖြစ် ရာခိုင်နှုန်းတော်တော်များများ ပါဝင်နေပါတယ်။ ဒါကြောင့် ဒါတွေကို recycle ပြန်လုပ်ပြီး အများပြည်သူအတွက် အပန်းဖြေစရာ နေရာလေးတစ်ခုဖြစ်အောင် ဖန်တီးခဲ့တဲ့ ဒီပရောဂျက်လေးကတော့ အတုယူဖွယ်ပါပဲ။
https://www.facebook.com/LamitanCityOfficial/videos/2282569472073431/
လင်းလင်း (ShweMom)
