မြန်မာငွေ(၁၀)သိန်းလောက်ပဲ ကုန်ကျစရိတ်ရှိတဲ့ ချစ်စဖွယ်လုံးချင်းအိမ်လေး

ဆောက်လုပ်ခစရိတ် သိပ်မကြီးလှတဲ့ အိမ်သေးသေးလေးတွေဟာ ခုနောက်ပိုင်းမှာ ပေါ်ပြူလာဖြစ်လာပါတယ်။ ဘတ်စ်ကားဟောင်းတွေ၊ ကွန်တိန်နာတွေကို လူနေလို့ရအောင် အိမ်ပုံစံပြင်လာကြတာကိုလည်း အွန်လိုင်းပေါ်မှာ တွေ့ရပါတယ်။ အခုဖော်ပြမှာတော့ diply အွန်လိုင်းဝက်ဆိုက်ဒ်ပေါ်မှာ တွေ့ရပြီး မြန်မာငွေ(၁၀) သိန်းလောက်ပဲ ကုန်ကျစရိတ်ရှိတဲ့ အမေရိကန် မွန်တားနားပြည်နယ်က အိမ်လေးတစ်လုံးပဲ ဖြစ်ပါတယ်။

instagram

အိမ်လေးကို စုံတွဲတစ်တွဲက ကြယ်ကြည့်ဖို့ရည်ရွယ်ပြီး ဆောက်ထားတာပါ။ ဓာတ်ပုံဆရာမ အဲလာပိုနိုမာဗီယာနဲ့ သူမရဲ့ အမျိုးသားက ဒီအိမ်လေးကို recycle ပြန်လုပ်ထားတဲ့ စွန့်ပစ်ပစ္စည်းတွေနဲ့ အိမ်နားတစ်ဝိုက်မှာ တွေ့ရတဲ့ ပစ္စည်းတွေသုံးပြီး ဆောက်လုပ်ထားတာပါ။ အိမ်လေးကို (၃) ပတ်နဲ့ ဆောက်လုပ်ပြီးစီးခဲ့ကာ စုစုပေါင်း ဒေါ်လာ(၇၀၀) ၀န်းကျင် ကုန်ကျခဲ့ပါတယ်။

instagram

အိမ်လေးအတွက် လျှပ်စစ်မီးကိုတော့ ဆိုလာပြားတွေကနေ ရယူပါတယ်။ ဖုန်းတစ်လုံး၊ နှစ်လုံးလောက်ကိုတော့ အသာလေး အားသွင်းနိုင်ပါတယ်။ အိမ်အတွင်းပိုင်းမှာ စတုရန်းပေ(၈၀) လောက်ရှိပါတယ်။ ခပ်ကျဉ်းကျဉ်းသေးသေးလေးမို့ အရုပ်အိမ်ပုံစံလေးတောင် ဖြစ်နေပါသေးတယ်။ အပြင်ပိုင်းမှာတော့ လူနှစ်ယောက်စာ အေးဆေးထိုင်လို့ရအောင် နေရာကွက်လက်လေး ချန်ထားပါတယ်။

READ
အဲကွန်းနဲ့ ပန်ကာ ပြိုင်တူမဖွင့်သင့်ကြောင်းအကြံပြုခဲ့တဲ့ မလေးရှားနည်းပညာရှင်
instagram
instagram

အိမ်ကလေးရဲ့ အတွင်းပိုင်းကို စိမ်းပြာရောင်ခြယ်ထားပါတယ်။အထဲက အိပ်ရာခင်းတွေကလည်း ပန်းရောင်တွေဖြစ်နေတာကြောင့် မြင်ရုံနဲ့တင် အိမ်လေးရဲ့ နွေးထွေးလှပမှုကို ခံစားရမှာပါ။ အိမ်ကို ခုထားတဲ့ သစ်တုံးတွေအပေါ်မှာတော့ ဇနီးမောင်နှံနှစ်ဦးက ပန်းအိုးလေးတွေ တင်ထားလို့ အိမ်လေးဟာ ပိုပြီးတောင် အရောင်တောက်နေပါတယ်။ သာမန်ရိုးကျတွေ့မြင်ရတဲ့ အိမ်တွေထက် အခုဖော်ပြထားတဲ့ အိမ်လေးကတော့ ရိုမန်းတစ်ဆန်ပြီး ပိုချစ်ဖို့ကောင်းနေပါတယ်။ ညဘက်ကြယ်တွေကြည့်ရင်း ကြယ်တွေအောက်မှာ အိပ်စက်ရတဲ့ အရသာကိုမြည်းစမ်းလိုသူတွေအတွက်တော့ အိပ်မက်ဆန်ဆန် နေရာလေးတစ်ခုပါပဲနော်။

instagram

လင်းလင်း (ShweMom)

SHARE